INTERNATIONAL – Nagdadagmit an mga residente nga mabilingan an iba pa nga mga survivor han narusdak nga building samtang padayon nga na-e-eksperyensya an aftershocks, duha ka-adlaw mahuman nga umigo an usa nga makusog nga linog nga nagin hinungdan han kamatayon han sobra 1,600 ka-tawo ha Myanmar.
Ginbay-og hin magnitude 7.7 nga linog an Mandalay City han nakalabay nga Biyernes ngan ginsundan ini hin usa pa nga magnitude 6.7 nga aftershock, pira ka minutos la mahuman an siyahan nga makusog nga linog.
Mahitungod hini, nangaro hin bulig hi Junta chief Min Aung Hlaing ha iba pa nga mga nasod para ha mas madagmit nga pagtindog han Myanmar.
Samtang, ha kaluyo nga bahin, nagdudumara gihapon hin mga operasyon an Bangkok Thailand agud masalbar an mga survivor nga na-trap ha sakob han usa nga 30 ka-andana nga skyscraper nga narusdak mahuman an makusog nga pagbay-og han tuna.
Subay han mga otoridad han Thailand, sumaka na ha 17 ka-tawo an namatay, samtang 32 an samaran ngan 83 an nawawara, kun diin ka-urugan ha mga biktima in nagtratrabaho ha mao nga tower.
