Naobserbahan ha maritime domain awareness (MDA) monitoring han Armed Forces of the Philippines (AFP) an paghitaas han presensya han mga barko han China ha bisinidad han Ayungin Shoal dida han nakalabay nga Myerkules.
Subay ha AFP, nasipatan an mga barko han China Coast Guard (CCG) nga nagdudumara hin manuevers ngan paghag-id gamit an water cannon ha kadagatan samtang pira nga gudti nga rigid-hulled inflatable boats ngan fast boats naman an gin deploy ha sulod mismo han shoal.
Ha kabug-usan, ada ha lima nga CCG vessel an presente ha lugar nga sinusuportahan han 11 RHIBs/fast boats ngan siyam pa nga Chinese maritime militia vessels.
Labot ha mga barko, nagdeploy gihapon an China hin aerial assets hine kaupod na an usa nga rotary aircraft ngan usa nga unmanned aerial vehicle.
Ha kaluyo hine, ginsigurado naman han AFP nga nagpapabilin ine nga comnmitted ha pagproteher ha soberanya han nasud ngan ha mga tropa nga naistasyon ha lugar.
