NATIONAL–Ginsigurado han Armed Forces of the Philippines (AFP) ngawaray nakikit-an nga hulga hin pag-atake tikang ha Iran kontra ha Pilipinas ha butngan han nagduduroy nga tensyon ha Middle East.
Sumala kan Rear Admiral Roy Vincent Trinidad, spokesperson han Philippine Navy, limitado la ha purluminos 2,000 ka kilometro an abot han missle system han Iran. Ginpahayag hine nga ada ha 7,500 ka kilometro an kahirayo han Pilipinas tikang ha Iran sanglit dire klaro nga umabot ine ha Pilipinas.
Dugang pa ni Trinidad nga magin an strategic US-UK military base nga Diego Garcia ha Indian Ocean in dire gihapon naaabot han missle capacity han Iran,
Ginklaro gihapon han AFP nga an mga lugar nga sakop han Enhanced Defense Cooperation Agreement (EDCA) in mga pasilidad nga pinag-iyahan han Pilipinas ngan dire mga base military han Estados Unidos.
Gingamit an mga ine para ha humanitarian assistance, disaster response, ngan joint drills ha mga kaalyado nga nasud, ngan dire kumo offensive attacks.
Nauna didi, mayada mga gumawas nga pahayag nga pwede magin target han Iran an mga EDCA sites panaglitan nga dumuroy an komosyon ha parte han Iran, Estados Unidos ngan Israel.
Mahugot gihapon nga ginpahayag han AFP nga an presente nga komosyon in usa nga regional nga istorya ha Middle East ngan dire upod an Pilipinas kumo proxy ha nasabi nga komosyon.
Nanawagan an military ha publiko nga magpabilin nga kalmado, magin maobserba ha impormasyon, ngan tumapod la ha opisyal nga pahayag han gobyerno.
