TACLOBAN CITY – Maabot na ha 144 an ihap han active cases han COVID-19 ha bug-os nga syudad han Tacloban.
Ini in mahuman an panibag-o nga 26 nga confirmed patients ha syudad nga naidugang kagab-i kun diin an mga ini healthcare workers ngan an iba naman in close contact han nauna nga mga pasyente nga nagpositibo gihapon ha mao nga sakit.
Sumala kan Dra. Gloria Fabrigas, head han Tacloban City Health Office, dire naman maikokonsidera nga community transmission an nahitatabo ha Tacloban pero ira nakikita nga kasagaran han transmisyon in nalibot ha magkapaparyente o magsarangkay la.
Sanglit utro nga ginpahimatngon hini ha publiko nga dire magtagya ngan magsunod ha mga protocols tungod nga mayda kaangayan nga kaso nga pwede nga kaatubangon han hin-o man nga mapapamatud-an nga nakatalapas ha quarantine protocols labi na yana na ginpailarom na an syudad ha General Community Quarantine (GCQ).
Ha pagkayana in maabot na ha 236 an kabug-usan nga COVID-19 cases ha Tacloban, 144 an active cases, 91 na an nakarekobers samtang usa naman an nahipatik nga namatay.
