TACLOBAN CITY – Titikangan na ha masunod nga academic year an Agricultural Competitiveness Enhancement Fund (ACEF) Scholarship program kun diin ginaaghat han Department of Agriculture Field Office 8 an mga para-guma ngan paru-pangisda nga may ada anak nga college student nga mag-apply ha mao nga programa.
Panuyuan hini nga scholarship in agud mabuligan an mga anak han mga parag-uma ngan paru-pangisda, ig-promote an agriculture ngan ig-aghat an mga kabataan nga kumuha hin kurso nga may kalabutan hiton agrikultura.
Sumala kan Department of Agriculture Field Office 8, Agribusiness and Marketing Assistance Division Staff, Jonel Cerbito nga may-ada la pipira nga state universities ngan colleges nga sakop hini nga ACEF Scholarship ngan sugad man mga college programs nga may-ada la COPC o Certificate of Program Compliance tikang hiton CHED an maka-avail hini.
Sakop han scholarship program an Biliran Province State University, Biliran Campus, Eastern Samar State University Borongan ngan Salcedo, Eastern Visayas State University Carigara, North-West Samar State University Main Campus ngan San Jorge, Samar State University Mercedes, Southern Leyte State University Main ngan Hinungan Campus, University of Eastern Philippines, ngan Visayas State University of Alang-alang, Tolosa ngan Villaba Campus.
An mga programs naman o kurso nga prayoridad hini nga scholarship in amo an BS in Agriculture, BS in Forestry, BS in Fisheries, BS in Food Technology, Horticulture, Animal Science, Agronomy, ngan iba pa nga may kalabutan hiton agrikultura ngan kinahanglan in COPC certified na ini nga mga kurso agud makabulig,
Dugang naman ni Cerbito nga an rekisitos han pag-avail han mao nga Scholarship Component hini nga ACEF Program, in amo an Certified True Copy han Birth Certificate o an PSA-Issued live birth.
Para naman han academic requirements han Incoming Freshmen, kinahanglan naman an Form 138, samtang an continuing students naman in kinahanglan la an COG for the latest semester, proof of income sugad han latest ITR, Certificate of Tax Exemption, Cert. Of No Income, Case Study Report tikang han MSWDO, ngan an proof nga an aplikante in anak hin parag-uma o paru-pangisda.
Samtang para naman han kadungan nga impormasyon hiunong hini nga ACEF Scholarship Program o an pag-apply hini nga programa, in pwede bisitahon an Department of Agriculture Field Office 8 o opisina hiton CHED o puydi gihapon bisitahon iton CHEDRO website. (VIA BOMBO SHIELA ENCIO)
