TACLOBAN CITY– Pormal na iginlunsar han Department of Education an Academic Recovery and Learning Accessibility o (ARAL) Program ha Tacloban City Division, agud nga mabaton an mga ayat ha pagbasa, pagsusurat, matematika, ngan science ha mga estudyante.
Basar ha Republic Act 12028 o Aral Law, an programa in may panuyuan nga maghatag hin sistematiko nga tutorial sessions para ha mga estudyante nga nanginginahanglan hin kadugangan nga suporta ha pag-aram.
Subay ba report han Tacloban City Division, ada ha 10, 957 o 23% han kabug-usa ngan populasyon han estudyante an kinahanglan mag-partisipar ha Aral Programs, basar na gihapon han resulta han beginning-of-school-year assessment.
Nakatalaan naman nga tikangan an implementation ha Setyembre 1, ha presente nga tuig.
Igtutudlok kumo ARAL tutors an mga magturutdo tikang ha magkaduro-dilain nga mga eskwelahan, diin an mga school heads ngan principals an mangunguna ha pagtudlok han mga magturutdo.
Sugad pa man, ginko-konsiderar han ahensiya an limitado nga espasyo ngan pondo para han pagbubuhat han tutorial session.
Kasumpay hini, ginlimatahan ha 5-15 la nga mga estudyante ha klase agud masigurado an kalidad han pag-aram.
Nanawagan naman hi Dr. Gretel Laura Cadion, Learning Resource Manager, Aral Program Focal Person, ha mga kag-anak nga suportahan ngan aghaton an ira mga anak nga magpartisipar han nasasbi nga programa.
Gin-aaghat gihapon han DepEd Tacloban City Division an mga LGUS, barangay officials, ngan iba pa nga stakeholders nga suportaran an programa, ngan mag-alutaga hin kadugangan nga pondo kalakip an Special Education Fund. (Bombo Shiela Encio)
