Lumaksi ha pinakahitaas nga lebel ha sulod han upat kabulan nga pag-ursa han pautang han mga bangko ha Pilipinas dida han Setyembre, kasunod han mas makusog nga panginahanglan ha kredito tikang ha mga negosyo ngan mamaralit.
Subay ha pauna nga datos han Bangko Sentral ng Pilipinas, sumaka ha 11.4% an pag-ursa han bank lending dida han Setyembre, mas hitaas ha 11% dida han Agosto. Umabot naman ha P15.27 trilyon an kabug-usan nga nasasalin nga pautang, tikang ha P13.70 trilyon dida han kaparehas nga bulan han nakalabay nga tuig.
Pangunahon nga nagduso ha pag-ursa an mga pautang para ha negosyo ngan produksyon nga humitaas hin 11% ha P12.84 trilyon. Kaupod ha mga sektor nga nakaghipatik hin dako nga paghitaas in an kuryente, gas, ngan iba pa nga suplay han enerhiya, nga humitaas ha 26.6%, samtag humitaas naman hin 14.5% an pautang ha manufacturing. Sugadman, umubos hin 11.6% an pautang ha construction sector.
Samtang, nagpapabilin ha 16.2% an pag-ursa han consumer lending, nga umabot ha P2.11 trilyon. Humitaashin 22.8% an credit card loans ngan 17.5% naman an salary-based loans.
Subay ha BSP, padayon hini nga babantayan an pagpapautang han mga bangko ngan an suplay han salapi ha nasud agud mapabilin an kadig-on han presyo ngan sistema nga pinansyal.
Ha bulag nga datos, humitaas hin 9.3% an money supply ha Pilipinas ngan umabot ha P20.7 trilyon dida han Setyembre, mas mahinay kumpara ha 10.8% nga pag-ursa dida han Agosto.
