TACLOBAN CITY – Gin kwestyon han publiko an kalidad han tubig nga nahihimo tikang ha sinalud ha uran o mahugaw nga tubig, nga gin paagi ha purifier, nga pwede dayun direkta nga mainom.
Sumala kan Ret. PMaj. Delfin “Dinky Boy” Bardillion, tag-iya hin Water Refilling Station ha syudad, hira nga mga may-ada negosyo nga tubigan in kinahanglan magsunod hin partikular nga standards ngan makagpasa hin mga kinahanglan nga rekisitos ugsa makagbaligya hin tubig nga irimnon.
Dugang pa hini, kada bulan in kinahanglan nira magpasa han resulta han ira bacteriological exam ngan kada kwarter in nagpapasa gihapon hira han resulta han physical-chemical exam ha Sanitary Department agud masigurado nga malimpyo ngan talwas ha pag-inom an ira ginbabaligya nga tubig.
Kun mayda man makit-an nga bisan gutiay la nga hugaw o bacteria ha resulta han nasabi nga mga eksaminasyon in igpapasara an ira negosyo ngan kinahanglan anay maipasa ngan masigurado nga talwas na ini ugsa makabalik ha operasyon.
Gin ayat naman hini an gobyerno nga igpaagi gihapon ha bacteriological ngan physical-chemical examination an tubig nga mahihimo tikang ha uran o mahugaw nga tubig ugsa ini igpa-inom ha katawhan agud masigurado an katalwasan hini, sugadman in malikayan an sakit nga posible makuha tikang hini.
