Sumaka na ha sobra P5.5 bilyon an kabug-usan nga danyos ha sektor han agrikultura ha magkadurudilain nga parte han nasud mahitungod ha padayon nga epekto han El Nino.
Basar ha pinakaurhi nga datos tikang ha National Disaster Risk Reduction and Management Council, maabot na ha 201,322 nga mga parag-uma ngan parupangisda an direkta nga naapektaran ngan nawarayan hin pakabuhi mahitungod ha katsirak.
Pinakagrabi nga nadarahigan an Cagayan Valley, nga ginsundan han mga rehiyon han CALABARZON, Bicol, Zamboanga Peninsula, Davao Region, SOCCSKSARGEN, ngan CARAGA.
Padayon naman nga nagpaabot hin bulig an magkadurudilain nga ahensya han gobyerno ngan lokal nga pangobyernuhan agud maipandestribwer an mga ayuda ngan alternatibo nga pakabuhi ha mga pamilya nga duro nga naapektaran han sakuna.
