TACLOBAN CITY– Utro nga nagka-engkwentro han tropa militar an pira nga mga miyembro han New Peoples Army ha Brgy. Calapi, Motiong Samar.
Subay ha 801ST Brigade, Civil-Military Operations Officer Philippine Army, Cpt. Doonie Diola, maabot ha 4 nga miyembro han Special Operations Group (SOG) han Yakal Platoon, SRC Browser, ha ilarom han grupo ni Alyas SODI an ira naka-engkwentro.
Dugang pa ni Diola, nagdugay ine hin 10 ka-minutos an nagin balyuay han buto, ngan naghuman la han kumalagiw an mga ine ha dire matudlok nga direkyon.
Waray naman may na-awat ngan nasamaran ha kampo hiton kasundaluhan, samtang gintutuohan naman han mga ine nga posible may nasamaran o namatay ha grupo han walhon nga grupo matungod nga mayda hira nakit-an nga mga dugo ha lugar kun diin natabo an engkwentro.
Nagresulta an operasyon ha pagkakakumpiskar han pira nga gamit kalakip na dinhi an 4 nga magazine han M16A1, usa gihapon nga halipot nga magazine han M16A1,1 nga granada, duha nga jungle pack, 1 bandolier, mga tambal ngan mga subersibong dokumento nga mayda higataas nga kantidad.
Mababaraun, nga an mga terorista nga grupo in may panuyo nga tangalon an anay mga igkasi miyembro nira ha nasabi nga lugar, kalakip na adton mga sibilyan nga kumalas na nga buligan ngan suportahan an terorista nga organisasyon.
