TACLOBAN CITY – Nagtikang na ha panhatag para han ika-duha nga tranche han Fuel Discount for Farmers and Fisherfolk Program (FDFFP) o Fuel Subsidy an Bureau of Fisheries and Aquatic Resources (BFAR) Eastern Visayas, kun diin sobra 3,000 nga mga rehistrado nga mga paru-pangisda ha Sinirangan Bisayas an nakatalaan nga makakakarawat hine.
Sumala kan Bureau of Fisheries and Aquatic Resources Eastern Visayas Information Officer, Christine Gresola, makarawat an kada paru-pangisda hin tag-P3,000 nga kantidad hin gasolina para ha ira mga motor nga de-makina nga makukuha naman ha mga accredited nga gasolinahan han BFAR ha rehiyon.
An nasabi nga lista in kanan 2023-2024 pa pero yana la nga tuig-2025 igin palusad han nasabi nga buhatan.
Manunumduman nga dida han nakalabay nga tuig-2022 in ginpalusad an syahan nga tranche han fuel subsidy kun diin ada ha sobra 5,000 nga mga paru-pangisda an nakakarawat hin tag-P3,000 nga kantidad hin gasolina.
Samtang, ha sobra 3,000 nga benepisyaryo han nasabi nga subsidiya, ada ha 381 an tikang ha Biliran; 394 an ha Northern Samar; 496 an ha Eastern Samar; 558 ha Samar; 735 ha Southern Leyte; ngan 576 naman an tikang ha Leyte.
Dire naman na makarawat ha ika-duha nga tranche adton mga nakakarawat na dida han syahan nga tranche.
Kasumpay hine, nag-abiso naman an BFAR ha mga kwalipikado nga benepisyaro nga pumakadto ha pinakaharani nga opisina han Universal Storefront Services Corporation (USSC) agud magpailarom han gintatawag nga Know-Your-Client (KYC) process para liwat han pag-isyu han kada tagsa nga fuel discount cards.
