NATIONAL–Umabot na ha nasud an 61 ka stranded Overseas Filipino Workers (OFWs) tikang ha Dubai, United Arab Emirates, yana nga Domingo ha Ninoy Aquino International Airport (NAIA) Terminal 3, sumala ha Department of Migrant Workers.
Sumala ha DMW, sakay an mga repatriated OFWs ha Emirates flight EK334 ngan kalakip ha mga umabot an 3 ka menor de edad.
Gintagan an mga ine hin bulig pinansyal ngan ha transportasyon tikang han DMW, ha pagbalik nira ha ira mga pronbinsya.
Dugang pa hine, gintagan gihapon hira hin temporaryo nga akomodasyon, psychosocial ngan bulik medikal.
Samtang, han Sabado in umabot na gihapon ha nasud an 81 ka stranded OFWs tikang ha Middle East ha butnga ha nagpapadayon nga tensyon ha rehiyon.
Padayon naman nga nakikipagsumpayan an gobyerno ha mga Pilipino ha iba nga nasud agud nga masigurado an ira katalwasan ngan mabuligan an mga naruruyag na nga umuli ha Pilipinas.
