TACLOBAN CITY – Iginkakabaraka han mga biktima han supertyphoon Yolanda nga ginbal-in ha mga resettlement sites ha northern barangays han syudad han Tacloban an seguridad han ira tagsa-tagsa nga pamilya mahitungod han pagkaada hin mga crack ngan guba ha mga housing units mahuman an nahitabo nga magnitude 6.5 nga linog kakulop.
Sumala kan Chris Durana, han grupo nga KADAMAY o Kalipunan ng Damayang Mahihirap, ha pagkayana in maabot na ha 53 nga mga housing units an nagkaada in damage ha Ridge View Park ha Tacloban North mahitungod ha nahipatik nga makusog nga linog.
Mahitungod hini in utro nga gumawas an isyu han daw pagiging substandard han mga pabahay ngan Yolanda resettlement sites.
Dugang pa ni Durana nga maiha na ini nira ginrereklamo ha mga hintutuinan pero pirit daw ini nga gintatago ngan diri gin-aaksyunan.
Panawagan han mga residente nga ha pagkayana in duro la gihapon an kahadlok mahuman nahitabo nga linog, nga aksyunan ngan inspeksyunon na ini han city government ngan Department of Interior and Local Government (DILG) agud nga masiguro nga talwas an gin-uukyan han mga Yolanda survivors.
Labot la ha Ridge View Park nagtutuo gihapon an mao nga grupo nga tanan han mga Yolanda housing projects ha Tacloban in nagkaada hin parehos nga problema mahuman an nahitabo nga linog kakulop.
Mahibabaruan nga una na nga naterminate an maabot ha napulo nga mga Yolanda housing developers ngan contractors ha Eastern Visayas mahuman nga mapamatud-an nga substandard an pagkahimo han mga panimalay.
