TACLOBAN CITY – Naatubang na ha patong-patong nga kaso an 5 nga mga suspek hin child trafficking ha probinsya han Biliran.
Una hini, nagdumara hin duwa nga magkasunod nga entrapment operation an mga otoridad kun diin naaresto an 5 nga mga suspek nga magkaparyente la.
Sumala kan Pol. Capt. Niño Lawrence Ibo, OIC han Womens Children Protection Center Visayas Field Unit (WCPCVFU), una nga gindumara an operasyon ha Brgy. Victory, Caibiran kun diin narescue an 2 anyos ngan 10 anyos nga bata nga babaye.
Ginsundan naman ini han operasyon ha Brgy. P. I. Garcia, Naval kun diin narescue an tulo pa nga minor de edad nga kababayin-an.
Nahibaruan nga an mao nga mga minors in ginpapagbuhat hin live lewd shows ha atubangan hiton computer kun diin an mga magkirita in mga foreigners nga nabayad hin tag $30 kada show.
Ha pagkayana in nagpapabilin naman ha kustodiya han Department of Social Welfare and Development (DSWD) an lima nga mga minor de edad.
