TACLOBAN CITY– Talwas na ngan ada ha maupay nga kahimtang an 5 ka-adlaw pala nga baby, mahuman nga mahidabi ine ha makarimadima nga panhitabo ha butnga han iya mga kag-anak Brgy.Pagsulhugon Sta. Rita Samar.
Subay ha gindumara nga imbestigasyon han mga otoridad, waray na kinabuhi han maabtan nira an bag-o pala kapanganak nga nanay mahuman ine pitlokon han iya asawa.
Ginkilala an biktima kan alyas Julie, samtang ginkilala naman an asawa hine nga hi alyas Rey ngan mga residente han nasabi nga lugar.
Sumala kan PMaj. Rex Pabunan, Chief of Police Sta. Rita Municipal Police Station, gin-hostage han suspek an iya asawa kaupod an 5 ka-adlaw pala nga ira anak, ngan naghulga ine nga papatayon an iya pamilya.
Dugang pa ni Pambunan, ginkikita nira nga angulo han pagkamatay han biktima, in matungod han kakuri hine nga makaginhawa tikang ha panmitlok, ngan pagtahob han baba hine agud nga dire maka-hinga.
Gintutuohan naman han kapulisan, nga mahuman an makarimadima nga pagpatay han suspek, nahuna-hunaan hine nga utasan an iya kinabuhi pinaagi han paggol-gol han iya liog gamit an hinganiban.
Una hine, naaobserbaran iton suspek nga pira na ka-adlaw waray ha sakto nga panhuna-huna, kun diin ine an ginkikita nga rason han mga otoridad kun kay-anu nabuhat hine an krimen.
