Usa nga 5-anyos nga bata ha China an naghimo hin kasaysayan mahuman ini opisyal nga kilal-on kumo pinakabata nga professional racecar driver ha bug-os nga kalibutan.
Nakuha ni Shao Ziyan an iya opisyal nga lisensya ngan training certificate tikang ha Runracing Driving Academy, ngan ginkikilala han China Automobile and Motorcycle Federation, dida han Abril 9, 2024. Ha bata nga edad nga 1-anyos, nahibaro na ini ha paggamit han racing simulators. Ugsa pa man mag 3-anyos, nagda-drive na ini hin race karts.
Pag-abot niya han 4-anyos, nagtikang na hiya sumabak ha mga propesyunal nga rally events kun diin nakuha hini an Hope Star Award ha 2023 China Rally Sprint Championship. Nagin kilala gihapon ini ha mga sikat nga racing simulators sugad han DiRT Rally 2.0 ngan WRC 10, kun diin nakasulod hiya ha top 30 han pinakamagkarit nga virtual drivers ha bug-os nga kalibutan.
Agud suportahan an kakaiba nga talento han bata, namuhunan an iya tatay hin gin babana-bana 800,000 yuan o maabot ha P6.4 milyon agud pumalit ngan mag-ayad hin mga modified racecars ngan advance driving simulators. An iya tatay gihapon an mismo nagseserbi nga co-pilot ni Ziyan ha mga opisyal nga karera.
Ha kaluyo han iya kakarit nga kaya tugbangan an mga professional racecar drivers, dire gintutugutan mag-drive hi Ziyan ha mga pampubliko nga karsada.
Kumo maghugot nga pagsunod ha Road Traffic Safety Law han China, an ngatanan han iya ginagamit nga race cars in iginsasakay anay ha trailers tikadto ha mismo nga race venues.
