Nagpagawas hin usa nga joint statement an upat nga anay Senate Presidents han Pilipinas, agud hangyo-on an madagmit nga pag-resolba ha presente nga kasamok ha Senado.
Ha ginpagawas nga pahayag nira anay Senate Presidents Aquilino “Koko” Pimentel III, Franklin Drilon, Juan Miguel “Migz” Zubiri ngan Vicente “Tito” Sotto III, gintaga-duon han mga ini nga moral nga responsibilidad nira nga magyakan para ha proteksyon han institusyon nga ira anay ginmamanguloan.
Sumala ha mga ini, an pangunahon nga obligasyon han lider han Senado in dire magkinapot ha posisyon lugod, dapat siguraduhon nga may respeto, marangal, ngan nasunod ha balaud an kapulungan nga ginmamangulo hini.
Nanawagan gihapon hira ha mga presente nga mambabalaud nga ig-undang an mga kasamok nga nagruruba ha imahe han Senado ha mata han publiko. Ginduon nira nga dapat limitahan an mga debate ha sakob han plenaryo o ha insakto nga forum la.
Sugadman, mahugot hini ginbaribaran ni Sen. Alan Cayetano nga kun diin, nanindugan hiya nga la gihapon an lehitimo ngan moral nga lider han Senado. Ginmalatumat gihapon hini nga usa nga “ilegal nga kudeta” an naganap.
