ODD – Mapaso nga ginpaghimangrawan han Malaysian netizens an bahin ha mag-asawa nga ginregulahan hin Mercedez Benz an ira anak nga 5-years old nga bata nga babaye para ganahan ini sumulod ha eskwelahan.
Nagpost ha TikTok hin usa nga video an businesswoman nga hi Farhana Zahra kun diin makikit-an nga ginpapakin-anhan hini an anak niya nga hi Fatima kun ano nga regalo an karuyag hini para ha tikaharani nga kaadlawan.
An baton ni Fatima ha iya nanay in karuyag hini hin green Mercedes G Wagon o BMW. Ha mao gihapon nga video in makikit-an nga nagsasaad hi Fatima nga masulod na ini ha eskwelahan kabalyo han iya gin-aaro nga sarakyan.
Subay ha usa nga social media post ni Farhana, gin-istorya hini nga nakukurian hira nga mag-asawa nga agahton an upat katuig nga hi Fatima nga magtitikang na sumulod ha eskwelahan matungod harani na ini maglima katuig.
Ha sumunod nga TikTok post ni Farhana, makikit-an nga naka-blindfold an mga mata ni Fatima para sorpresahon ini ha regalo nga green nga Mercedes G Wagon nga nakabutang ha usa nga transparent nga kahon.
Tunga an reaksiyon han mga nitizens ha mga nasabi nga TikTok videos, mayda naman pira nga gindadayaw an pagiging galante han mga kag-anak para la maaghat an anak nga sumulod ha eskwelahan samtang an iba naman in ginbatikos an mga ini matungod deri naman kaya gamiton hin usa bata an SUV.
