SAN MIGUEL, LEYTE – Ada ha 392 nga mga parag-uma tikang ha magkaduru-dilain nga barangay han San Miguel, Leyte an nakakarawat hin discount voucher ha abuno pinaagi han paghatag nga pinangunahan han lokal nga pangobyernuhan han San Miguel, Leyte.
An nasabi nga panhatag in pinaagi gihapon han pakig-koordina ha Department of Agriculture (DA) ngan Municipal Agriculture Office (OMAG).
Sumala kan San Miguel, Leyte Mayor Atty. Norman Sabdao, an mga parag-uma nga kumarawat han nasabi nga voucher in tikang ha mga barangay nga hagluag an mga umhanan.
Amu ine an mga Barangays han Bahay, Bairan, Cabatianuhan, Guianciaman, Libtong, Lukay, ngan Malaguinabot.
An discount voucher nga pinanhatag in kaparte han Fertilizer Discount Voucher Program ha ilarom han National Rice Program, nga gindisenyo agud bumulig ha mga parag-uma nga rehistrado ha Registry System for Basic Sectors in Agriculture (RSBSA).
Makakabulig naman an nasabi nga voucher ha pag-iban han presyo han mga papliton nga kinahanglan ha pag-uma han mga parag-uma sugad nala hiton abuno ngan iba pa nga suplay ha pag-uma.
