SAN JULIAN, EASTERN SAMAR – Padayon an monitoring ngan assessment han lokal nga panggobyernohan han San Julian, Eastern Samar, mahuman bay-ugon hin 6.1 nga linog an Sinirangan Bisayas, kakulop nga adlaw, Mayo 4.
Subay kan San Julian Municipal Mayor, Dorie Jorgie Estaron, nagbuhat na hin assessment an Municipal Disaster Risk Reduction and Management Office (MDRRMO) ngan Municipal Engineering Office.
Basar ha inisyal nga report, 36 nga private structures an nadistroso, diin nagkamay-ada an mga ine hin minimal nga mga bitak or hairline cracks ha mga pader.
22 naman nga public infrastructure an may minor damages lakip an municipal building, mga iskuylahan, police station, evacuation centers ngan simbahan.
Dugang pa han opisyal, may mga bitak na an chapel tikang han mga nakalabay nga pagbay-og, pero nadugangan ine han 6.1 nga linog.
Usa gihapon nga indibidwal an nasamaran mahuman maigo hin falling debris tikang han ira panimalay.
Nagka-ada ine hin minor abrasion pero dayon naman natagan hin medikal nga atensyon.
Ha kaluyo hine, ginsugurado han opisyal nga talwas na gamiton an mga buildings ha San Julian, basar han ginbuhat nga inspeksyon han Municipal Engineering Office.
Gintugutan na gihapon an mga empleyado nga bumalik ha trabaho, ngan padayon na an operasyon han mga opisina.
Dako naman an ginhubas o nagkamay-ada hin low tide han kadagatan han lugar mahuman an na-eksperyensiyahan nga linog.
Naghaon naman an LGU San Julian hin letter request ha Provincial Government para ha kadugangan nga infrastructure audit, agud mapanginano an kabug-usan nga structural integrity han mga buildings, ngan matudlok an kinahanglan pag-aydon.
Ha pagkayana, dire pa nagdedeklara hin “state of calamity” ha lugar.
Dugang pa han alkalde, bisan man kun dire direkta nga ada ha fault line an San Julian, napapalibutan ine hin mga geological fault ngan hirani ha dagat, rason nga hitaas an posibilidad nga maapektuhan han dagko nga linog.
Kasumpay hine, importante an padayon nga pangandaman, lakip na an regular nga pagbubuhat hin earthquake drills.
Nagpahimatngon naman an MDRRMO ha mga molupyo nga magpabilin nga mapagmatyag, ngan sumunod ha mga ginpapatuman nga aludayday agud magin talwas. #
