TACLOBAN CITY – Maabot ha 3,000 nga mga Overseas Filipino Workers (OFWs) nga nawarayan hin trabaho tungod han COVID-19 pandemic an makakarawat hin tig-10 mil pesos nga ayuda tikang ha Overseas Workers Welfare Administration (OWWA) Regional Office 8.
Sumala kan Sergio Borgueta, Regional Director han OWWA 8, an mao nga ayuda para ha mga displaced OFWs in pinaagi han ira programa nga OFW Tulong sa Pag-unlad.
Prayoridad han OWWA nga matagan han mao nga ayuda an mga displaced Landbased and Sea-based Filipino workers nga nag-apply han DOLE AKAP program pero waray katagi tungod han pagkaubos han pondo.
Ha pagkayana in padayon an pagpamulat han pondo han OWWA para han mao nga program.
Agud nga makatagamtam han ayuda kinahanglan la nga igpresentar han OFW an dokumento nga magpapamatuod nga nawarayan hiya hin trabaho tungod han COVID-19 pandemic ngan sugadman an iya pasaporte.
