NATIONAL – Ginbabasol yana han Department of Information and Communications Technology an dire pagretiro han 2G network ng ausa ha mga rason han padayon nga pagsarang han “text scams” ha nasud.
Ini mangud an gingagamit han pira pa nga mga Philippine Offshore Gaming Operators o POGO ha ira mga International Mobile Subscriber Indetity device o mas kilala kumo IMSI catchers.
Sumala kan DICT Undersecretary Jeffrey Ian Dy, an sugad nga klase han kagamita in nagana la ha mga network nga mas hamubo ha 3G kun diin, mas maupay kun magkamayda hin “timeline” kun san-o titikangan an pagtanggal han mga 2G ngan mas hamubo pa nga mobile technology ha Pilipinas.
Ginduon naman han mao nga undersecretary, nga ira naiintidehan gihapon an posible nga epekto hini ha ekonomiya kun igpadayon an pagtatanggal ha 2G network.
Samtang, ginduduso naman han ahensiya an pagkakamayda hin mas hilarum pa nga diskusyon kasumpay ha mao nga himangrawon.
