TACLOBAN CITY—Maabot ha 2,821 an igpapasarang nga mga kasundaluhan hiton 8ID Philippine Army, para bumulig ha pagsigurado hiton peace and security ha tiarabot nga piniliay.
Sumala kan Capt. Jefferson Mariano, Division Public Affairs Office 8ID Philippine Army, an nasabi nga ihap in direkta nga igdedeploy ha bug-os nga area hiton Sinirangan Bisayas.
Dugang pa hine, nakipagsumpayan na gihapon hira ha mga Comelec officials magin ha mga PNP personnels ngan han tanan nga mga tinaglawas hiton barangay agud nga magk-urusa hira ha pagpatuman hiton seguridad ha adlaw hiton piniliay.
Ginmalatumat naman hine nga ha nasabi nga ihap naka pukos an 2,434 nga mga kasundaluhan ha combat mode o Focus military operation.
An mga ine in nakatudlok ha mga Geographically Isolated and Disadvantaged Areas (GIDAs) ha rehiyon.
Ginpaangbit pa ni Mariano, nga ha Samar area usa la nga lugar an ira ginkokonsidera ngan mahugot nga babantayan an Sta. Margarita Samar, kun diin nakapailarom ine ha red category.
Nanawagan naman ine hin kooperasyon ha publko, nga dayon makipagsumpayan ha ira ha oras nga mayda an mga ine makit-an nga urusahon, ngan mga dire ordinaryo nga buruhaton nga ma-obserbaran ha ira lugar.
Ginsisigurado naman han ira han-ay nga 24/7 hira nga magbabantay kutob hiton adlaw ngan kahuman hiton election agud nga mamintinar an peace and securities ha Eastern Visayas.
