Sumaka na ha P4.8 bilyon an kabug-usan nga kantidad han mga propyedad nga na-freeze han gobyerno kasumpay ha gin iimbestigahan nga flood control scam.
Kaupod ha mga gintututukan yana han Independent Commission for Infrastructure (ICI) in an ada ha 28 water assets, kaupod na an pira nga yate, nga gintotoohan ginpalit gamit an pondo han gobyerno.
Gin kumpirma ni Undersecretary Aboy Paraiso, Executive Director han Cybercrime Investigation and Coordinating Center (CICC) ngan tagmangulo han Technical Working Group han ICI, nga an mga sakayan-pandagat in sakop na han freeze order han Anti-Money Laundering Council (AMLC).
Bisan man kun waray na ngarani an mga tag-iya, ginklaro ni Paraiso nga mahugot na an ira pakikigsumpayan ha Maritime Industry Authority (MARINA) para ha beripikasyon ngan posible nga madugangan pa an ihap han mga kukumpiskahon nga sarakyan.
Nagpahimatngon gihapon an opisyal ha mga indibidwal nga dabi ha anomaliya nga waray gamit an pagtatago han ira mga karikuhan.
Dugang pa hine, gamit an makabag-o nga teknolohiya ngan digital nga imbestigasyon, sigurado nga mabibilngan ngan babawion han gobyerno an kada sentimo nga kinawat tikang ha pondo han mga proyekto nga pambaha.
