DOH 8, nakaghipatik hin panibag-o nga mga kaso hin HIV/AIDS

TACLOBAN CITY- Guinpakurukusog an kampanya ha publiko han Department of Health (DOH) Regional Office 8 samtang nga nagkikitahitas an kaso han Human Immunodeficiency Virus/Acquired Immune Deficiency Syndrome (HIV/AIDS) ha Rehiyon 8.

Sumala kan Roderick Boyd Cerro, program manager han HIV/AIDS control and prevention nga kumpirmado an 22 nga panibag-o nga ihap han mao nga sakit yana nga bulan.

Guinduon ni Cerro nga may ada paghatas ha kaso han HIV/AIDS tikang dida han 1989, an tuig kun diin nahipatik an syahan nga kaso han HIV ha Sinirangan Bisayas.

Dugang pa ni Cerro nga 44 nga kaso han HIV an nahipatik tikang dida han Enero hasta yana nga Mayo 2017 kumpara han 104 nga kaso dida han nakalabay nga tuig.

Ha pagkayana, nagsumatotal na hin 434 nga kaso han HIV an rehiyon kun diin 32 ha mga ini an  nagkamatay na basi ha record han surveillance unit han Department of Health Regional Office 8.

Samtang, nanawagan naman ha publiko an pamunuan han DOH nga likayan an diri makatarungan nga pakipaghilawas ha bisan hin-o la nga tawo agud nga mapabilin an kahimsog han panlawas.