TACLOBAN CITY — Samaran an duha nga sundalo samtang patay naman an usa nga miyembro han New Peoples Army (NPA) ha natabo nga engkwentro ha Barangay Aruganga, Dolores Eastern Samar.
Sumala kan LtCol. Oliver Alvior, Commanding Officer han 78th IB han Phil. Army, nga pumakadto an mga kasundaluhan ha mao barangay mahuman nga magreport ha ira an pira nga mga residente kasumpay ha natatabo nga extortion activities han tigda nala hira nga pauranan hin bala han mga rebelde nga grupo.
Nagbilin naman hin duwa nga samaran tikang ha tropa han gobyerno an mao nga nagin engkwentro samtang usa naman an naawatan hin kinabuhi ha panig han NPA.
Narekober naman ha mao nga lugar an pira nga explosive device ngan hand grenade.
Nagpapadayon naman an gindudumara nga hot pursuit operation han AFP ha mao nga mga miyembro han NPA samtang nagpapaupay ngan ada na ha stable nga kondisyon an duha nga nasamaran nga sundalo.
