TACLOBAN CITY – Maabot ha 15 nga mga armas an narekopo han mga kasundaluhan han natabo nga engkwentro ha butnga han 74th Infantry Battalion Philippine Army, ngan han mga gintutuohan nga walhon nga grupo ha Barangay Magsaysay, Mapanas, Northern Samar.
Sumala kan Capt. Jefferson Mariano, Division Public Affairs Officer 8ID PA, una hine naghatag hin impormasyon an anay rebelde nga sumurender na ha gobyerno nga may pipira pa nga mga New People’s Army NPA, an nagliliniyong-liyong ha ha mao nga lugar.
Ha mao nga engkwentro maabot ha 30 nga mga rebelde an ginbabana-bana nga nakipagbalyuay hin buto hiton pusil ha mga kasundaluhan, kun diin nagdugay ine hin 20 ka-minutos.
Ha lain nga bahin, nakag-angkon naman hin minor injury an usa ha myembro han kasundaluhan kun diin nagpapa-upay na ine hapagkayana.
Samtang, waray naman may nakit-an nga mga dugo ha lugar kun diin natabo an engkwentro, ngan ginbeberipika pa han mga otoridad kun mayda nasamaran ha kampo han mga walhon nga grupo.
Naghatag naman ine hin higayon para ha mga rebelde nga pananglitan may nasamaran ha mga ine, abre ngan andam an grupo han gobyerno nga maghatag hin medikal nga bulig.
