TACLOBAN CITY – Dumangop ha mga kapulisan an usa nga 14 anyos nga babayi para igreport an daw panlugos ha iya han lima nga mga kalalakin-an nga iya la ngahaw mga kakilala ha syudad han Tacloban.
Sumala kan Pol. Capt. Daniel Polo, station commander han Abucay Police Station 2, dumangop ha ira buhatan an 14 anyos nag biktima para igreklamo an lima nga mga suspek nga daw ginpalamadyaan hiya han alas dose han umagahon han nakalabay nga Agusto 22.
Ha interogasyon han mga kapulisan, iginpahayag han biktima nga sangkay la ngahaw niya an lima nga mga suspek kun diin samtang tipauli na ini nga biktima ha ira panimalay in gin-ayat ini han mga suspek nga mag-inom hin makahurubog nga irimnon.
Han mahubog na an mao nga 14 anyos nga biktima in gin-aalegar nga ginlugos han mga suspek.
Dayon naman nga nagdumara hin operasyon an mga kapulisan nga nagresulta ha pagkakadakop han duha nga suspek kun diin usa hini an 16 anyos nga menor de edad ngan sugadman usa nga 18 anyos nga ulitawo.
Padayon naman nga ginhahalpat han mga kapulisan an tulo pa nga mga suspek ha mao nga insidente.
