TACLOBAN CITY– Talwas na an 11 nga mga pasahero lakip na an usa nga dos-anyos nga bata mahuman maigo han makusog nga subasko nga balud ha kadagatan ha may Barangay Tinaogan Catbalogan City Samar.
Sumala kan LT. Paul Albert Asis, PCG, Station Commander Coast Guard Western Samar, subay han ira imbestigasyon, an nasabi nga mga pasahero in tikang ha Barangay Bayog Daram Samar, kun diin kahuhuman la nira mag-harvest hiton bangus ngan tipauli na an mga ine ha Catbalogan Samar.
Dugang pa ni Asis, nga han ka-abti han mga ine hin subasko ha dagat, tumaob an ira ginsasakyan, kun diin sumampa nala an mga ine ha bawbaw han nasabi nga sakayan.
Pasado alas 6:20 han gabi, nakaka-karawat hin tawag ang coast guard ngan mahuman an 45 minutos ugsa nga matad-an an lokasyon han mga ine.
Nabaruan nga an nasabi nga motorbanca in pribado nga gintatag-iyahan han nasabi nga mga passengers.
Waray naman nasamaran o namatay ha mao nga insidente.
Dayon naman ang mga ine gintapo han ira mga kapamilya, ngan nagdesisyon nga umuli nala ha ira panimalay imbes nga kumadto ha ospital.
