TACLOBAN CITY – Usa an patay ngan 8 katawo an samaran ha natabo nga bakbakan han duha nga Private Armed Groups ha Brgy. Bahay, Sta. Margarita, Samar.
Ha pakipaghimangraw han Bombo Tacloban kan PSSUPT Nicolas Torre III, Hepe han Samar Police Provincial Office, nga guinkilala an namatay nga hi Enrique Manas, aa ha legal nga pangidaron ngan residente ha mao nga lugar.
Padayon naman nga guintatambal ha pagkayana ha hospital an 8 nga samaran kaupod na hini an anak han namatay nga hi Alfred Manas ngan usa ga pulis nga napusil samtang nga nagdudumara hin Hot pursuit operation nga hi PO1 Riny Boy Tumale, 29 anyos an pangidaron.
Sumala kan Torre, nga tigda nala nga guinsulong an mga biktima han maabot unom nga kalalakin-an nga guinkilala kanda Nelson deborbon, Christopher Deborbon, Ricky Calagos, Reymart Antivo, Joel Calagos ngan Sofronio Medoranda nga may dara nga mga de kalibre nga armas de fuego.
Dagmit naman nga nagpahirayo an mga suspek mahuman nga mapuruhan an usa nga target.
Ha guinbuhat nga Hot pursuit operation han mga Kapulisan, nadakop an tulo nga mga suspek samtang padayon pa nga guinbibiling an tulo nga iba pa.
Guinpasakahan naman hin kaso nga Murder ngan Attempted Murderha Provincial Prosecutor an mga suspek.
Narekober naman han mga Kapulisan an M16, Armalight ngan iba pa nga kalibre hin pusil.
Sumala kan PSSUPT Torre nga posible daw nga away ha tuna ngan mga higamit an hinungdan han mao nga insidente.
