TACLOBAN CITY– Patay an usa nga construction worker, samtang 2 samaran, mahuman nga aksidente nga matabunan han ira ginde-demolish nga building ha Calbayog City Samar.
Sumala kan Calbayog City Police Station, Chief Investigator, PLT. Jayson Rivera, ha ira gindumara nga imbestigasyon, samtang nag di-demolish an nasabi nga mga construction worker, sinmaka an mga ine ha atop han building kun diin ginpapanginano han mga ine an kadig-on han atop.
Ha dire ginlalauman nga panhitabo, gin-pa andar han backhoe operator an makina han backhoe truck, kun diin aksidente hine nga naigo an beam han building nga nagresulta han pagrusdak hine, ngan natabunan an 3 nga construction worker nga nagresulta han pagkamatay han usa ha mga ine.
Ginkilala naman an namatay kan Noel Mderanda Ander, 47-anyos ngan residente han Calbayog City Samar.
Samtang ginkilala naman an nasamaran, Jhonstin Urungan, alyas Arvin ngan Paquito Baluka ngan tanan an mga ine in taga Calbayog gihapon.
Ha pagkayana, gin-undang la anay an operasyon ha nasabi nga lugar, samtang gindudumara pa an imbestigasyon.
