TACLOBAN CITY – Padayon nga ginbibiling han Dulag Municipal Police Station an drayber han truck nga nakabunggo han usa nga motorsiklo ha Brgy. Barangga, Combis Dulag, Leyte,
Mahibabaruan nga ha mao nga inisdente in namatay an drayber han motor ngan samaran an mag nanay nga sakay hini.
Ginkilala an mga biktima nga hi Roel Balbareo, 40 anyos, usa nga OFW, ngan residente ha Villa Rosa Burauen, Leyte ngan sakay hini hi Lilibeth Maria Padua, 44 anyos ngan Clifford Kent Dumaging, 19 anyos nga nag-uukoy ha Baybay City, Leyte.
Sumala PCInsp. Jimmy Boy Balasanos, COP ha Dulag PNP, maagahon nahinabo an insidenter rason gutiay la an kumita han panhitabo. Nakuha daw han usa nga residente an plate number han truck, pero diri daw ini ma- trace ngan waray naman daw ine record ha LTO.
Mahitungod han makusog nga impact han pagbungguay han duha nga behikulo in nagresulta dayon ini ha pagkamatay han biktima. Matapos daw an insidente in kumalagiw dayon an drayber han truck.
Sumala naman kan PO2 Joselito Buhay, imbistigador han mao nga insidente, nakukurian hira pag biling ha kinamumutangan han suspek. Kumadto na hira ha mga hagrani nga bungto ngan gin kita an mga CCTV nga makakabulig ha ira imbistigasyon pero diri daw klaro an mga kuha hini.
Samtang, nananawagan naman an pamilya han biktima ha makakagtudlok ha pagkakakilanlan han suspek ngan nag hahangyo nga sumurrender na ini ha mga otoridad.
Maatubang ha kaso nga wreckless imprudence resulting to homicide ngan attempted murder an drayber han truck.
