TACLOBAN CITY – Patay an usa nga suspek mahuman nga mapusil samtang ginproprobaran hine nga tawtawon an usa nga naka-uniporme nga tinaglawas han PNP ha Brgy. Sta. Rosa Barugo, Leyte.
Ginkilala an napusil kan Jaime Raagas, 49-anyos an pangidaron, ngan residente han parehas nga barangay.
Sumala kan PCMSgt. Rico Cañeda, Duty Investigator han Barugo Municipal Police Station, nga nagkamayda anay hin dire pagkaka-intindihay an suspek ngan an syahan nga biktima nga ginkilala kan Emilio Diloy, 74-anyos an pangidaron, ngan residente han Brgy. Sta. Rosa Barugo, Leyte.
Basar han inisyal nga imbestigayon han kapulisan, mahitungod han duro nga kahubugan in ginpauli na han biktima adton suspek haira panimalay pero imbes daw nga sumugot ine in nangalas an suspek ha biktima rason para kumuha ine hin sundang ha ira panimalay ngan panawtawon adton biktima kun diin nag-angkon naman hin igo ha luyo nga parte han lawas hine.
Nakadalagan naman an biktima ha usa nga balay kun diin didto nag-uukoy an nagsaway nga pulis nga hi Pat. Rafael Maglinte, 32-anyos an pangidaron, membro han PNP nga naka-assign ha 2nd PMFC 3rd MC.
Gin saway daw han pulis an suspek pero imbes nga mamati ine haiya in gin prubaran gihapon hiya pagtawtawa rason para gamiton hine an iya service firearm para maproteheran an iya kalugaringon. Nag-angkon naman an suspek hin igo ha may dughan nga parte han iya lawas rason han kamatayon hine.
Dayon nga gindara an suspek ha pinaka harani nga ospital pero gindeklara ine nga dead on arrival.
Samtang, temporaryo naman nga ginsurrender ha kapulisan an service firearm han nagresponde nga pulis para han kadugangan nga eksaminasyon.
