TACLOBAN CITY – Nakumpiskar ha gindumara nga Veterinary Quarantine Checkpoint ha San Juanico Bridge an maabot ha P1.6 million nga kantidad hin iba iba nga frozen pork meat products tikang ha Bulacan.
An mao nga operasyon in kasunod ha nagpapabilin nga total ban ha syudad han tanan han produkto hin karne tikang ha Luzon mahitungod ha hulga han African Swine Fever.
Sumala kan Tacloban City Veterinarian Dr. Eunice Alcantara, ginkumpiskar nira an mga produkto mahitungod ha kakulangan hin mga dokumento nga ginkikinahanglan para makasakob an mga ini ha syudad.
Sakay ha delivery van an 700 nga crates hin frozen meat kun diin nakatalaan unta ini nga igdeliver ha mga tindahan ha Tacloban, Ormoc, Digos City, Iligan City, San Francisco City, Koronadal City, Butuan, ngan Surigao.
Nahibaruan nga una na nga nagpagawas hin executive order hi Tacloban City Mayor Alfred Romualdez nga nagdidire ha mga produkto nga karne tikang ha Luzon agud nga malikayan an pakasakob han ginkakabarak-an nga african swine fever ha syudad.
Ha pagkayana in ginlubong na an mga ginkumpiskar nga meat products ha sanitary landfill han syudad.
Manunumduman nga una na nga nagpahayag an Department of Agriculture 8 nga talwas la gihapon ha African Swine Fever ( ASF ) an Sinirangan Bisayas.
